Ormar hjálpa við moltugerð

Rakst á skemmtilega og athyglsiverða umfjöllun um moltugerð með hjálp orma. Ormarnir flýta fyrir moltugerðinni með því einfaldlega að borða lífræna sorpið og skila því sem næringaríkum áburði. Mjög athyglisvert sem gaman væri að prófa. Ágætis umfjöllun um efnið á Wikipediu - Vermicompost, margir búa til orma-moltugerðina sjálfir úr ódýrum ílátum. Á YouTube er að finna fjölda myndbanda um efnið. Enda þennan stutta póst með ágætis myndbandi um wormery.

Sniðug lausn fyrir lífrænt sorp

Í upphafi vorum við mikið að velta fyrir okkur hvernig ílát ofl væru best til að flokk sorpið okkar.

Í dag erum við komin með þokkalegustu aðstöðu sem við látum mjög vel af.

Hins vegar eru einnig til ódýrari og jafnvel praktískari og umhverfisvænni lausnir. Ein af þeim er að nota einfaldlega mjólkurfernur undir lífræna ruslið. Þær halda raka vel, er auðvelt að skola og nota aftur og lokast þokkalega vel.

Einfaldlega opnið tómu mjólkurfernuna upp á gátt, komið henni fyrri í ruslaskápnum og setjið lífræna sorpið í hana.

Einfaldara verður það ekki...

Mynd fengin af vef MS

Flokkunarstöð - Taka 1

Eins og áður hefur komið fram höfum við lagt mikla vinnu í að finan og útbúa góða flokkunarstöð eins og við viljum kalla það.

Lausnin okkar felst í tveimur útdraganlegum sleðum með ruslafötum í frá IKEA. Tvær rennur passa í alla venjulega skápa. Það eru til tvær týpur af ruslafötum: Stórar með skilrúmi eins og sést á myndinni og minni með loki sem voru uppseldar. Við biðum því með að kaupa í aðra rennuna en ruslafatan fyrir lífræna sorpið smellpassar í rennuna svo það gengur fínt. Eins og við var að búast er öll flokkun mun einfaldari núna. Fremst er óflokkanlegt heimilissorp, fyrir innan það eru fernur og umbúðir. Í hinni rennunni er lífræna sorpið. Við notum svo "Blaðberann" frá Fréttablaðinu fyrir Dagblöð og pappír.

Flokkunin er mun auðveldari og skilvirkari. Það eina sem við erum í smá vandræðum með er flokkun á gleri og járni. Skv. flokkunartöflunni og grænu tunnunni á að flokka gler eins og sultukrukkur sér og járn eins og lok af krukkum og niðursuðudósir sér. Við notum sjaldan þessa vöruflokka og erum í hálfgerðu plássleysi. Erum að hugsa um að bæta við einni lítillri fötu og og setja gler og járn þar í aðskilda poka (P.S. Íslenska gámafélagið fer fram á að við flokkum í poka fyrir Grænu tunnuna til að auðvelda flokkunina hjá þeim.). Batterí flokkum við sér í þartilgerðan kassa sem við fengum hjá Hringrás. Við höfum þó verulega dregið úr notkun battería og notum mest hleðslubatterí.

Afsakið gæðin á myndinni en hún er tekin á síma.

Hjólað í vinnuna og hjólað í Reykjavík

Átakinu Hjólað í vinnuna lauk fyrir helgi. Ég hjólaði flesta daga og ferðaðist tæpa 200 km. á hjólinu á þessum tíma. Það var sérstaklega gaman að sjá hve mörg hjól voru á götunum og hve fjölmiðlar tóku vel við sér í umræðunni um hjólreiðar sem valkost í samgöngumálum.

Eins og alltaf fannst mér ekki nógu skemmtilegt að taka þátt í þessu átaki, hefði viljað sjá meiri stemningu á stígunum. Sjáum til hvað gerist að ári.

Hjólreiðar eru án efa valkostur fyrir umhverfisþenkjandi fólk, sérstaklega einhverja 6-7 mánuði á ári. Bæjarfélög og vegagerðin verður þó að taka sig á til að þetta geti orðið raunhæfur valkostur fyrir alla. Ágætis umræða var á leiðaraopnu Morgunblaðsins á mánudaginn 26.maí um vöntun á hjólreiðastígum meðfram stofnæðum. En 24 stundir hafa sérstaklega staðið sig vel í umfjöllun um hjólreiðar.

Landssamtök hjólreiðamanna, Fjallahjólaklúbburinn og ÍSÍ eiga hrós skilið fyrir góða og mikla kynningu á málefnum hjólreiðamanna á þessu tímabili.

Lífrænt sorp

Með moltugerðartunnunni frá Íslenska gámafélaginu fengum við ruslafötu fyrir lífrænt sorp og poka úr maís-sterkju sem brotna niður í moltukassanum. Sambærileg lausn fæst einnig hjá http://www.nattura.is/ og Gámaþjónustunni/Flutningatækni.
Fatan hefur reynst okkur mjög vel. Við verðum ekki vör við neina lykt eða óhreinindi. Við erum þó enn ekki farin að setja kjöt, fisk né mjólurafurðir í fötuna þar sem við viljum koma moltugerðinni betur af stað fyrst. Við forðumst einnig að setja mikið af lauk og sítrusávöxtum. Þetta er samt töluvert magn sem við tæmum ca á 4 daga fresti.
Mælum hiklaust með þessari lausn!

Umhverfisvænir bílaleigubílar og einkabílar

Bílalleigan Hertz hefur nú í nokkurn tíma boðið upp á vistvæna bílaleigubíla, á dögunum fékk fyrirtækið verðskuldaða viðurkenningu frá Orkusetrinu. Þrátt fyrir þessa viðurkenningu og töluvert umtal er lítið að finan um málið á heimasíðu Hertz á Íslandi en mun meira um málið á Hertz.com. Á bókunarsíðunni er samt hægt að bóka "eco friendly" bíl.
Vandamálið við þessa bíla er kanski fyrst og fremst verðið. Það er hægt að fá bíla á ágætis verðum hjá Hertz en hybrid bílarnir kosta í kringum 30 þúsund dagurinn.
Við seldum annan fjöldkyldubílinn í haust og erum búin að vera einbíla síðan. Það hefur gengið það vel að við höfum alverlega hugleytt að selja hinn bílinn (dísel jepplingur) og fá okkur umhverfisvænni og ódýrari bíl og leigja bíl þegar okkur vantar jeppa eða stærri bíl.
Hugmyndin vaknaði þegar við heyrðum af ZipCar þar sem þú gerist hluthafi og hefur aðgang af bílum af öllum stærðum og gerðum fyrir ótrúlega lítinn pening. Ágætis dæmisaga um ágæti þessa fyrirbæris á http://carfree-char.blogspot.com/ þar sem miðaldra kona segir frá því ferli að selja bílinn og gerast Zip-ari. Hún leigir sér smábíl ef hún þarf að skreppa til fjölskyldunar út úr borginni, pallbíl ef hún þarf að kaupa eitthvað í garðinn osfrv.
Það væri gaman að sjá hvort ekki væri hægt að gera einhvers konar fyrirtækjasamning við bílaleigurnar á Íslandi um að leigja bíl reglulega hjá þeim og fá góð afsláttarkjör í staðin. Þetta væri væntanlega ekkrt mál á veturnar en gæti orðið snúið að fá bíl á bónuskjörum á sumrin?

Flokkunarstöð!!!

Loksins loksins erum við búin að fá okkur vísi að flokkunarstöð.
Fengum hana í Ikea eftir langa bið. Setjum inn myndir og comment síðar.

Upphitun fyrir Hjólað í vinnuna

Fjallahjólaklúbburinn býður upp á kvöldferðir á Höfuðborgarsvæðinu öll þriðjudagskvöld í sumar. Ferðirnar eru ætlaðar öllum, bæði byrjendum og lengra komnum. Hjólað er um Höfuðborgarsvæðið, t.d. Breiðholtshringurinn, Garðabæjarhringurinn, fuglaskoðun í Grafarvogi og kaffihúsaferð í miðbæinn. Ferðirnar eru opnar öllum og hefjast kl.20.00 við skiptistöðina í Mjódd. Frábær leið til að koma sér í gang og kynnast fólki á hjólum. Fyrsta ferðin er beint í klúbbhús Fjallahjólaklúbbsins þannig að ef eitthvað er að hjólinu er líklega hægt að kippa því í liðinn í klúbbhúsinu.

Hjólað í vinnuna að hefjast

Á miðvikudaginn 7.maí hefst átakið Hjólað í vinnuna.
Við hjólum reglulega í vinnuna og það er alveg ótrúlega lítið mál.
Þetta er rétta tækifærið til að prófa. Flestir vinnustaðir eru með i þessari keppni en yfir 7000 manns tóku þátt í fyrra sumar.
Flestir eiga hjól í skúrnum eða þekkja einhvern sem á ónotað hjól, enn fleiri eiga flíspeysu og vindjakka. Meira þarf nú ekki!
Næsta vika verður tileinkuð Hjólað í vinnuna...

Flokkunarpokar

Á fyrstu þremur 4 mánuðum átaksins höfum við eytt miklum tíma og vinnu við að koma okkur upp "flokkunarstöð", stað á heimilinu þar sem öll flokkun fer fram. Við höfum prófað margt og með mjög misjöfnum árangri. Til að byrja með flokkuðum við í plastpoka svona það helsta og fórum svo með það í grendargáma. Satt best að segja gekk það ekki nógu vel, okkur langaði í skilvirkara og betra kerfi. Um daginn fengum við flokkunarpoka frá Sorpu sem hafa reynst ágætlega. Þetta eru tveir nokkuð stórir pokar. Annar undir dagblöð og tímarit og hinn fyrir sléttan pappír (Fernur, morgunkornsumbúðir osfrv.). Þessir pokar eru á margan hátt mun þægilegri en "Blaðberinn" frá Fréttablaðinu fyrst og fremst þar sem þeir eru stærri og þeir lokast að hluta. Þetta er sérstaklega mikilvægt ef notast er við grendargámana.

Eftir að við fengum okkur "endurvinnslutunnu" (Fást frítt á www.flokkum.is næstu tvo mánuðina) hentar "blaðberinn" frá fréttablaðinu betur fyrir blöð og tímarit, hann er svo auðvitað miklu fallegri og hægt að hafa á eldhúsgólfinu án þess að skammast sín! :)

Endurvinnslutunnan hefur gjörbreytt flokkuninni okkar og gert allt miklu auðveldara, við mæalum sterklega með þeim. Sérstaklega þegar í ljós kemur að magnið sem fer í hefðbundna sorpið snarminnkar og því gætum við líklega fengið okkur grænu tunnuna frá Reykjavíkurborg sem er einungis tæmd á tveggja vikna fresti. Þar með væri maður búinn að borga endurvinnslutunnuna upp.

Við erum samt enn að leita okkur að hagkvæmri flokkunarstöð í anda þess sem til er í IKEA en hefur verið uppseld mánuðum saman. Ef þú, lesandi, veist um einhverja sniðuga lausn endilega skildu eftir comment.

Gámaþjónustan, visthópar og sparakstursnámskeið

Gámaþjónustan býður eins og áður sagði upp á endurvinnslutunnu. Þeir bjóða einnig upp á tunnur til moltugerðar, poka fyrir lífrænt sorp ofl.
Það er klárlega hægt að verða sér út um þessa hluti þó svo að það geti verið ansi flókið oft á tíðum.
Rakst á vef Landverndar að hægt væri að skrá sig í visthópa sem Landvernd kennir á 12 vikum hvernig heimili geta orðið vistvæn. Fylgt er skrefunum úr bæklingnum Skref fyrir skref sem er ný-endurútgefinn. Áhugavert... Líklegt að við skráum okkur og leyfum lesendum að fylgjast með!
Annað námskeið sem okkur langar til að benda á er sparakstursnámskeið Heklu, hvet sem flesta til að nýta sér það.

Umhverfissýning um helgina

Fórum á Dag umhverfisins í Perlunni um helgina, hjólandi auðvitað.
Ekki nógu spennandi sýning og allt of lítið af fólki. Þarna voru þó ágætis básar inn á milli.
Sorpa var að gefa flokkunarpoka, Landssamband hjólreiðamanna bauð upp á hjólaviðgerðir (BÆK Doktor) og Fuglaverndarfélag Íslands gaf góð ráð um garðfugla og fuglavernd.
Íslenska Gámafélagið var að kynna fría endurvinnslutunnu í tvo mánuði sem mér sýndist margir vera að taka.
Landvernd var einnig að kynna nýjan "Skref fyrir skref" bækling! Lítur bara bel út, við notum þennan bækling mikið til að still okkur af og til að fá hugmyndir.
Þarna var einnig verið að kynna ræstingavörur, leikföng, fatnað ofl.
Maður fær það samt alltaf á tilfinninguna að við séum áratugum á eftir Evrópu í umhverfisvernd.

Blogged with the Flock Browser

Frh. Sparperur

Fín færsla um sparperur á Orkusetrinu. Þetta á endanlega eftir að sannfæra efasemdamenn!
www.orkusetur.is er annars skemmtilegur vefur, við höfum sérstaklega skoðað hann með tilliti til eldsneytiseyðslu.

Blogged with the Flock Browser

Sparperur

Á Grænlandi erum við að stíga okkur fyrstu skref í að nota sparperur. Í upphafi sögðum við að við ætlum okkur hægt í sakirnar og verða græn hægt en vel. Við höfum því undanfarið keypt sparperur í stað hefðbundinna í stað þess að fara í fjárfestingu að skipta öllum út. Reynsla okkar af þessum perum er mjög góð. Þær er hægt að fá í öllum mögulegum stærðum og gerðum, meira að segja í halogen ljós.
Flestar perurnar höfum við keypt í IKEA en einnig í Egg og Húsasmiðjunni.
Perurnar endast margfalt lengur en hefðbundnar perur, 6-15 x lengur, auk þess sem að þær eyða margfalt minna rafmagni.
Perurnar innihalda reyndar skaðleg efni og því ætti að ganga vel frá perum sem brotna og auðvitað að fara með allar perur í endurvinnslu.

Blogged with the Flock Browser

Er hægt að hætta að nota plastpoka?

Í þessu græna ferli okkar fer maður sífellt að spá í fleiri og fleiri hluti. Við höfum t.d. mikið rætt um pappírsmagnið sem kemur inn um lúguna og plastpokanna sem maður tekur í búðum.
Við erum búin að vera prófa okkur aðeins áfram með að taka poka með okkur að versla. Við keyptum mjög góða endurnýtanlega poka í IKEA um daginn sem við höfum verið að prófa að nota undanfarið.
Þetta er auðveldara en maður heldur. IKEA pokarnir kosta aðeins 60 kr og borga sig því upp í einni ferð (Bónus selur líka poka en þeir eru svo ljótir að það er ekki hægt að nota þá). Það eiga einnig margir poka úr bómull sem merktir eru búðum, skólum osfrv. Það er einnig hægt að kaupa fína poka á netinu t.d. BAGGU sem hafa fengið töluverða umfjöllun í tískutímaritum.
Við höfum svo verið að prófa okkur áfram með poka í ruslið sem brotna niður í náttúrunni unna úr sterkju. Þá er hægt að fá á nokkrum stöðum í Reykjavík og Plastprent hefur verið að prófa sig áfram í framleiðslu á þannig pokum.
Skelli hérna með ágætis myndbandi sem ég hvet lesendur til að skoða, þetta vekur mann til umhugsunar...


Hlekkir:
http://www.reusablebags.com/

http://baggubag.com/

http://www.envirosax.com/

http://store.chicobag.com/product/original-chicobag

http://www.ecobags.com/

Endurvinnslutunnur í prófun

Íslenska gámafélagið hafði samband við mig í kjölfar bréfs þar sem ég var að kynna bloggið og bauð okkur vörur sínar til prófunar. Við þáðum það enda einn tilgangur bloggsins að kanna sem flesta möguleika til að auðvelda fjölskyldum að snúa við blaðinu í umhverfismálum.
Íslenska gámafélagið sendu okkur grænu tunnuna sem ég hef fjallað um áður, moltugerðartunnu og ruslafötu og lífræna poka fyrir heimilissorp.
Þetta kom okkur á mikið skrið, við erum strax farin að nota grænu tunnuna. Flokkum núna pappír í pokann sem við fengum frá Fréttablaðinu um helgina. Flokkum fernur í plastpoka sem fara svo í grænu tunnuna. Setjum allt lífrænt í nýju ruslafötuna osfrv.

Við finnum strax mun með tilkomu grænu tunnunar en pappírsmagnið sem fellur frá venjulegu heimili er ótrúlegt. Því er einnig haldið fram að með því að flokka lífrænt sorp í moltugerð minki sorpið um 25-35%. Við stefnum nú á að standa okkur það vel að við getum lagt svörtu ruslatunnunni og fengið græna tunnu frá borginni í staðin. Hún er tæmd á tveggja vikna fresti og er mun ódýrari.

Agnes hjá Íslenska Gámafélaginu benti okkur á tilraun Stykkishólmsbæjar í endurvinnslu. Allir íbúar bæjarins fengu afhentar þrjár sorptunnur í janúar; eina græna tunnu, eina brúna fyrir lífrænt sorp og eina hefðbundna. Allir bæjarbúar fengu tilsögn í endurvinnslu og eftir fyrstu mánuðinn var 95% þáttaka í verkefninu en skv. könnun á heimasíðunni er 80% þáttaka þessa dagan. Þetta er því hægt!

Á vef Stykkishólmsbæjar eru góðir linkar fyrir moltugerðina. Við erum að lesa þessa bæklinga í þaula en við búum því miður ekki við sama lúxus og Stykkishólmsbúar að vera með moltugerðarstöð.

Við munum fjalla reglulega um reynslu okkar af vörunum frá Íslenska gámafélaginu og bendum öðrum fyrirtækjum á að hafa samband ef þau vilja að við prófum vörur þeirra.

Vöknun í umhverfismálum

Greinilegt er að fyrritæki eru að vakna til lífsins í umhverfismálum. Nýjasta útspil Fréttalaðsins er "blaðberinn", sérhönnuð taska undir dagblöð. Sniðug pæling, sérstaklega fyrir þá sem þurfa að fara í grendargáma eins og ég.

Grænland ætlar að reyna að nálgast svona tösku og skrifa nánar um hana.

Endilega skiljið eftir comment ef þið eruð að nota einhverjar sniðugar lausnir við flokkun.

Boðskort á Dag umhverfisins

Grænland fékk boðskort á Dag umhverfisins. Sýningin er opin föstudaginn 25.apríl frá 13 til 17 og laugardaginn 26.apríl frá 11 til 17.
Ótrúlegt en satt þá fundum við engar upplýsingar á vef Umhverfisráðuneytisins!!

Hjólað í vinnuna

Var boðaður á skemmtilegan fund með vinnuhópi "Hjólað í vinnuna".
Fékk að fljóta með Fjallahjólaklúbbnum og Landsamtök hjólreiðamanna.
Hjólað í vinnuna er fullkomið tækifæri til að rífa sig upp og prófa vistvænni og heilbrigðari samgöngumáta. Við ætlum að reyna að gera viðburðinn skemmtilegri en áður sem vonandi tekst. Bendi fólki á ótrúlega merkilegt kort sem sýnir hve stuttar vegalengdirnar í Reykjavík eru í raun og veru. ÍSÍ hefur einnig gefið út nettan bækling um hjólreiðar, þar er að finna ágætis æfingaplan og leiðbeiningar.
Hjólað í vinnuna hefst fimmtudaginn 7.maí og stendur til 21.maí.
Í kvöld kl.20.00 fimmtudaginn 17.apríl er viðgerðanámskeið fyrir byrjendur í Fjallahjólaklúbbnum sem er öllum opið, tilvalið að nota það til að fara yfir hjólið fyrir vorið.
Þriðjudagskvöldið 6. maí hefjast svo kvöldferðir Fjallahjólaklúbbsins sem farnar eru alla þriðjudaga í sumar kl.20.00 frá Mjódd, þar eru allir velkomnir.

Loftgæði og hjólreiðar

Svolítið furðulegt að hjóla í vinnuna í morgun. Mikið ryk og sandfok. Var sem betur fer með hjólagleraugun en fann samt fyrir rykinu í augunum þegar ég kom inn. Þegar ég svo opnaði síðuna okkar þá sá ég á loftgæðamælinum hér til hliðar (Fengin að láni frá Reykjavíkurborg) að loftgæðin eru mjög slæm í dag. Gaman að fylgjast með þessum mæli og hve loftgæðin eru misjöfn, eitthvað sem maður tekur sem sjálfsögðum hlut á Íslandi.

Endurvinnsla á heimilinu

Þetta gengur skemmtilega brösulega að breyta heimilinu í grænt heimili. Við lendum á alls kyns veggjum. Undanfarnar vikur höfum við verið að leita að hentugum ílátum til að flokka sorp. Framboðið er vægast sagt lélegt. Náttúra er með mjög góðar tunnur fyrir lífrænan úrgang en þær raðast illa hjá okkur. Ikea er með mjög spennandi lausn en hún er búin að vera uppseld í allt vor. Rekstrarvörur eiga einhvers konar kerfi en þar hefur enginn svarað póstum frá mér og hef ég því ákveðið að gefa þá upp á bátinn. Enn flokkum við því heimilissorpið og lífrænasorpið saman og hendum því í svörtu ruslatunnuna. Blöð, fernur og annað flokkum við í poka og kassa og förum með í grendargámana.

Vistvænn lífsstíll - umhverfissýning

Umhverfisráðuneytið, Úrvinnslusjóður og SORPA standa fyrir sýningunni Vistvænn lífsstíll í Perlunni 25. og 26. apríl næstkomandi. Þar verður fyrirtækjum, stofnunum og félögum gefinn kostur á að kynna vörur, starf og þjónustu er stuðla að vistvænum lífsstíl almennings. Sýningin á að vekja athygli fólks á þeim fjölmörgu vistvænu vörum og þeirri þjónustu sem nú þegar er hægt að nálgast til að viðhafa vistvænan lífsstíl.

Hjólað í vinnuna

Ein besta og einfaldasta leið til að spara pening og verða umhverfisvænni er að hjóla í vinnuna. Við seldum annan fjölskyldubílinn og annað okkar hjólar oftast nær í vinnuna, stundum bæði, annars förum við saman á einum bíl.

Flest okkar eiga hjól í skúrnum eða bakgarðinum og er um að gera að nota þau hjól. Það þarf als engin keppnishjól til að hjóla í vinnuna. Ef ekkert hjól er á heimilinu þá mælum við með viðurkenndum hjólabúðum og þektum merkjum. Það að hafa ábyrgan aðila til að sinna viðhaldi á hjólinu á fyrstu vikunum er ómetanlegt. Góð hjól auka einnig ánægjuna við að hjóla og gera þessa ákvörðun miklu mun léttari. Við mælum því með verslunum eins og Markinu og Erninum eða GÁP og Útilífi.

Fyrir innabæjarhjólreiðar er best að fá sér einfalt og traust hjól, svokölluð comfort hjól og hybrid hjól eru mjög hentug. Þau eru með þægilega ásetu og yfirleitt með tiltölulega sléttum dekkjum. Það er svo hægt að færa sig yfir í meiri græjur seinna meir. Það hefur reynst okkur vel að fjárfesta í góðum brettum, helst sem fest eru með teinum (Ekki smellubretti). Á hjólunum okkar erum við einnig með góða lása, drykkjarbrúsa, pumpu og hnakktösku með útbúnaði til að skipta um dekk ef springur og slöngur. Það getur einnig aukið ánægju að hafa einfalda hjólatölvu svo hægt sé að fylgjast með hraða og fjölda km hjólaða.

Hjálmur, ljós og endurskinsmerki eru einnig nauðsynleg þrátt fyrir að nú sé bjart allan daginn.

Við munum fjalla mun meira um hjólreiðar á næstu vikum sérstaklega í aðdraganda "Hjólað í vinnnuna" sem stendur frá 7.-21.maí.

Hvaða tunnu eigum við að fá?

Endurvinnslutunnur hafa mikið verið í umræðunni undanfarið. Nokkrir aðilar bjóða upp þessa þjónustu en engin er þó nákvæmlega eins.

Þrír aðilar bjóða upp á endurvinnslutunnur á Höfuðborgarsvæðinu: Reykjavíkurborg, Íslenska gámafélagið og Gámaþjónustan. Persónulega er ég hrifnari af framtaki einkaaðilanna. Þjónusta þeirra er mjög sambærileg en þar sem Græna tunnan frá Íslenska Gámafélaginu er ódýrari (Munurinn er þó aðeins 480 kr. á ári) þá er hún sigurvegarinn í þessari könnun (Hvað er samt málið með heimasíðuna þeirra?).

Á Grænlandi er hægt er að finna skýran samanburð á tunnunum þremur.

*Mynd af tunnum tekin af www.rvk.is

Sorpa

Sorpa er sífellt að bæta vefinn sinn um flokkun og endurvinnslu. Það sem er gaman að sjá á bæði vef Sorpu og Landverndar er hversu mikla áherslu þeir leggja á fræðslu fyrir börn. Það á án efa eftir að skila sér. Sífellt fleiri skólar fá Grænfánann, vonandi eiga þessi börn eftir að taka vandamálið traustari tökum en við.

Sorpa er með nýuppfærða flokkunartöflu sem hægt er að fá senda heim til sín. Einfaldlega sendið póst á sorpa@sorpa.is og biðjið um að fá senda flokkunartöflu. Þessi tafla á heima í hverju eldhúsi við flokkunaraðstöðuna. Þessi tafla hjálpar manni einnig mikið við að skipuleggja flokkunarstöð. Hvernig á ég að skipuleggja flokkunarstöðina, á ég að hafa margar ruslafötur, hvað má fara saman osfrv. Við munum fara mjög ítarlega í þetta ferli í næstu póstum. Við hvetjum ykkur til að kynna ykkur vef Sorpu vel því þar er mikið að finna. T.d. hvar næstu grendargáma er að finna og endurvinnslustöðvar. Þar er einnig að finna upplýsingar um jarðgerð fyrir þá sem hafa tækifæri og vilja til þess en Reykjavíkurborg gaf út bækling um jarðgerð sem þó virðist vera eitthvað kominn til ára sinna. Hann er engu að síður nokkuð góður sérstaklega svona á fyrstu skrefum heimilisjarðgerðar.

Hvernig byrja ég?

Framsetning á efni um umhverfisvernd heimilanna er ótrúlega ómerkilegt, dreyft og torfundið. Ýmsar stofnanir, félagasamtök og jafnvel fyrirtæki hafa þó sett ágætis efni á Vefinn.
Á síðu Landverndar er kafli sem kallast Vistvernd í verki , þar er að finna ágætis bækling sem kallast Skref fyrir skref: Vistvernd að verki sem gefinn er út af Landvernd og Umhverfisráðuneytinu. Þetta er ágætis bæklingur og kemur manni fljótt á sporið. Ég hvet alla til að kynna sér bæklinginn vel en ekki prenta hann út heldur frekar lesa á netinu.
Við höfum ákveðið að fylgja þessum leiðbeiningum að einhverju leiti, meira um það síðar.
Ef þið vitið um einhverjar skemmtilega síður endilega commentið.

Ákvörðunin

Við lítum á okkur sem umhverfisvæn, tölum töluvert um umhverfisvernd, erum á móti stóriðju osfrv. Samt höfðum við einhvernvegin aldrei látið verkin tala, við hálf skömmuðumst okkar fyrir að segjast vera umhverfisvæn en flokka svo ekki sorpið, eiga tvo bíla og hamstra plastpoka í matvörubúðunum. Við ákváðum því að taka okkur taki og reyna að gerast umhverfisvænni.
Við erum ósköp venjuleg fjölskylda, hjón með 1 árs strák og lítinn hund. Við vorum sammála um að fara hægt af stað, engar öfgar heldur láta þetta gerast náttúrulega og eðlilega. Við byrjuðum á því að selja annan fjölskyldubílinn, héðan í frá ætluðum við að nota sama bílinn, hjóla og prófa almenningssamgöngur. Það verður að segjast að það var mun þægilegra að eiga tvo bíla en hægt og rólega kemmst maður að því að með smá skipulagningu er ekkert mál að vera einbíla. Það hjálpar til að vera tilbúinn að hjóla og með aðstöðu til þess í vinnunni. Meira um það síðar.
Það kom þægilega á óvart hvað fjárhagur heimilisins varð léttari við að losna við annan bílinn.
Þessi fyrstu skref voru þó mun torveldari en við gerðum ráð fyrir, einna helst voru það praktísk atriði eins og hvernig er best að flokka, hugmyndir um flokkunarkerfi, hvað nota eigi í stað plastpoka osfrv. Í þessu ferli kviknaði sú hugmynd að blogga um þessa tilraun okkar og um leið að segja frá reynslu okkar. Við ætlum því að fjalla um hvernig við verðum umhverfisvænni, hvað við lærum í þessu ferli og hvað reynist okkur vel og hvað ekki.
Þetta er Grænland!